សម្ដេចបវរធិបតី ហ៊ុន ម៉ាណែត៖ អតីតព្រះតេជគុណ ជួន កក្កដា សម្រេចចិត្តលាចាកសិក្ខាបទដោយព្រះអង្គឯង មិនមាននរណាចាប់បង្ខំឡើយ
ឆ្លើយតបទៅនឹងការចោទប្រកាន់គ្មានមូលដ្ឋានមួយចំនួនថា រាជរដ្ឋាភិបាលចាប់បង្ខំផ្សឹក អតីតព្រះតេជគុណ ជួន កក្កដា នោះជារឿងមិនពិតទេ តាមពិតព្រះអង្គបាន សម្រេចចិត្តលាចាកសិក្ខាបទដោយព្រះអង្គឯង និងបានប្រកាសតាមហ្វេសប៊ុកថា ទោះបីព្រះអង្គសិកជាឧបាសកក៏នៅតែជួយព្រះពុទ្ធសាសនាជារៀងដរាប។ក្នុងឱកាសអញ្ជើញជាអធិបតី បើកពិធីបុណ្យទន្លេលើកទី៩ ក្រោមប្រធានបទ គុណតម្លៃនៃទន្លេ៖ ផ្សារភ្ជាប់វប្បធម៌ និងទេសចរណ៍ធម្មជាតិ នាព្រលប់ថ្ងៃសៅរ៍ ទី២២ ខែមីនា ឆ្នាំ២០២៥នេះ សម្តេចបវរធិបតី ហ៊ុន ម៉ាណែត បានថ្លែងអះអាងថា រាជរដ្ឋាភិបាល មិនបានចាប់បង្ខំផ្សឹក អតីតព្រះតេជគុណ ជួន កក្កដា នោះឡើយ។
ការបដិសេធដូច្នេះ បន្ទាប់ពីក្រុមប្រឆាំងជ្រុលនិយម បានលើកឡើងដដែលៗថា «របបរដ្ឋាភិបាល ត្រកូល ហ៊ុន សូម្បី លោក ក៏ចាប់ផ្សឹកដែរ» ។
ផ្ទុយទៅវិញ សម្ដេចធិបតី បានថ្លែងថា ភរិយារបស់សម្ដេច គឺលោកជំទាវ ពេជ ចន្ទមុន្នី បានសម្ដែងការសោកស្ដាយ ហើយក៏មិនចង់ឱ្យលោកលាចាកសិក្ខាបទដែរ។
ជាមួយគ្នានេះ សម្តេចបវរធិបតី បានស្នើពុទ្ធសាសនិក បន្តគាំទ្រ ចំពោះគម្រោងជួយវិស័យពុទ្ធសាសនា ដែលផ្ដួចផ្ដើមដោយបច្ចុប្បន្ន បណ្ឌិត ជួន កក្កដា ដើម្បីជាប្រយោជន៍ដល់វិស័យពុទ្ធសាសនា និងជួយកុមារជំនាន់ក្រោយ ដែលសិក្សានៅពុទ្ធិកសិក្សា៕ ដោយ៖ គង់ សិរីរ័ត្ន, រូបថត៖ គល់ រ៉េននី
